EN | AM

Վերաբերում է անգամ նրանց, ում թվում է, թե չի վերաբերում


01.12.2015
Վերա Բրեժնևան որպես տարածաշրջանային տեղեկատվական արշավի առաջնորդ կոչ է անում յուրաքանչյուրին անցնել ՄԻԱՎ-ի հետազոտություն:

Հայաստանում, ինչպես և Արևելյան Եվրոպայի և Կենտրոնական Ասիայի երկրներում մեկնարկում է ՄԻԱՎ-ի հետազոտման տեղեկատվական արշավը

2015 թ. դեկտեմբերի 1-ին ՀՀ առողջապահության նախարարությունը ՄԱԿ-ի ՄԻԱՎ/ՁԻԱՀ-ի դեմ պայքարի միացյալ ծրագրի հետ համատեղ մեկնարկել է  տարածաշրջանային ՄԻԱՎ-ի հետազոտման տեղեկատվական արշավը: Միջոցառման ընթացքում ՄԻԱՎ-ի վերաբերյալ կամավոր հետազոտություններ են կազմակերպվել շրջիկ կլինիկայում:

ՄԱԿ-ի ՄԻԱՎ/ՁԻԱՀ-ի դեմ պայքարի միացյալ ծրագրի (ՄԱՁԻԱՀ) տարածաշրջանային Բարի կամքի դեսպան Վերա Բրեժնևան հանդիսանում է տարածաշրջանային տեղեկատվական արշավի առաջնորդը, ով կոչ է անում յուրաքանչյուրին անցնել ՄԻԱՎ-ի հետազոտություն:  Տեղեկատվական արշավի նպատակն է գրավել այն մարդկանց ուշադրությունը, ովքեր կարող են վարակված լինել ՄԻԱՎ-ով, սակայն չգիտեն իրենց կարգավիճակը և համարում են, որ դա նրանց չի վերաբերվում:

Ամբողջ աշխարհում ՄԻԱՎ-ով ապրող անձանց մոտավորապես կեսը չգիտեն իրենց կարգավիճակի մասին: Արևելյան Եվրոպայի և Կենտրոնական Ասիայի երկրներում շարունակվում է նոր դեպքերի աճը. համաձայն  գնահատականների՝ տարածաշրջանում ՄԻԱՎ-ով ապրում է ավելի քան 1,5 մլն մարդ: Բացի այդ  տարեկան գրանցվում է 150 հազար նոր դեպք:

Այսօր մեծ տոկոս են կազմում արդեն հիվանդության ախտանշանների դրսևորման փուլում ախտորոշում ստացող հիվանդները: Մտահոգիչ է, որ հակառետ­րովիրուսային բուժման հասանելիության պայման­ներում, որը ՀՀ քաղաքացիներին տրամադրվում է անվճար, ՄԻԱՎ վարակից մահացութ­յունը մեծապես պայմա­նավորված է վարակի ուշ հայտնաբերումով, հետևաբար` անհրաժեշտ բուժումն ուշ սկսելով: Հիվանդության վաղ ախտորոշումը, ժամանակին սկսված հակառետրո­վիրու­սային բուժումը ոչ միայն հնարավորություն են տալիս արդյունավետորեն կառավարելու հիվանդության զարգացումը, էապես երկա­րացնելու հիվանդի կյանքի տևողությունն ու բարելավելու կյանքի որակը, այլև նպաստում են ՄԻԱՎ վարակի հետագա տարածման կանխմանը: Իսկ հիվանդության վաղ ախտորոշման համար անհրաժեշտ է ՄԻԱՎ-ով վարակմանը նպաստող վարքագծի դրսևորման դեպքում անցնել ՄԻԱՎ-ի վերաբերյալ հետազոտություն` անկախ առողջական վիճակից գանգատների առկա­յության: 

ՄԻԱՎ-ի տեղեկատվական արշավի նախաձեռնողը Արևելյան Եվրոպայի և Կենտրոնական Ասիայի ՄԱՁԻԱՀ-ի տարածաշրջանային գրասենյակն է, իսկ համագործակիցը՝ «Համադասարանցիներ» (Одноклассники) սոցիալական ցանցը: Սույն սոցիալական ցանցը օրական մուտք են գործում ավելի քան 48 մլն մարդ Ռուսաստանից, ԱՊՀ երկրներից և ամբողջ աշխարհից, որը հնարավորություն կտա ՄԻԱՎ-ի հետազոտություն անցնելու անհրաժեշտության վերաբերյալ տեղեկատվությունը հասանելի դարձնել նրանց համար:

Դեկտեմբերի 1-ից սկսած ok.ru/test կայքէջում օգտատերերը կարող են տեղեկանալ  ՄԻԱՎ-ի հետազոտությանը և բուժմանը վերաբերվող հարցերին, կարդալ պատմություններ այն մարդկանց մասին, ովքեր առնչվել են սույն հիմնախնդրին, տեղադրել իրենց նկարները,  ինչպես նաև կարող են ուղիղ եթերով շփվել Վերա Բրեժնեվայի հետ՝ Մոսկվայի ժամանակով ժամը 14:00-15:00:

 

ՄԱԿ-ի ՄԻԱՎ/ՁԻԱՀ-ի դեմ պայքարի միացյալ ծրագրի «90-90-90» նոր ռազմավարության նպատակներն են հասնել նրան, որ.

 - ՄԻԱՎ-ով ապրող անձանց 90%-ը իմանան իրենց կարգավիճակը,

- ՄԻԱՎ-ով ապրող անձանց 90%-ը, ովքեր գիտեն իրենց կարգավիճակը, ստանան հակառետրովիրուսային բուժում,

- հակառետրովիրուսային բուժում ստացող անձանց 90%-ը, արձանագրի վիրուսային ծանրաբեռնվածության չհայտնաբերվող մակարդակ:

Սույն տեղեկատվական արշավը ուղղված է առաջին «90»-ի նպատակին, այն է՝ իրենց կարգավիճակը իմացող անձանց մասնաբաժնի մեծացում:

2014թ. դրությամբ աշխարհում կար 36,9 մլն ՄԻԱՎ-ով ապրող մարդ: 1988թ. մինչև 2015թ. դեկտեմբերի 1-ը Հայաստանի Հանրապետության ՀՀ քաղաքացիների շրջանում գրանցվել է ՄԻԱՎ վարակի 2214 դեպք: ՄԻԱՎ/ՁԻԱՀ-ի իրավիճակի գնահատումը վկայում է, որ հանրապետությունում ՄԻԱՎ-ով ապրող մարդկանց հաշվարկային թիվը կազմում է 3800:

Քարոզարշավի տեսահոլովակը կարող եք դիտել այստեղ ։

Օրվա միջոցառումների մասին լուսանկարներ կարող եք գտնել այստեղ։