ՄԱԿ-ի Հայկական ասոցիացիայի նախաձեռնությամբ և վեց հասարակական կազմակերպությունների հետ համագործակցությամբ այսօր ՄԱԿ-ի գրասենյակում տեղի ունեցավ բարեգործական ցուցահանդես-վաճառք:
Կառավարության ներկայացուցիչներ, հասարակական և միջազգային ոլորտի գործիչներ ու լրատվամիջոցների ներկայացուցիչներ համախմբվել էին աջակցելու Հաիթիի ժողովրդին` գնելով արվեստի աշխատանքներ, որոնք ներկայացրել էին 'Փյունիկ' հաշմանդամների միությունը, Հայաստանի մանուկներ հիմնադրամը, 'Դավիթ' արվեստի կենտրոնը, Մայր Աթոռ Սուրբ Էջմիածնի և Հայկական բարեգործական ընդհանուր միության երիտասարդաց տները, 'Փրկություն' հաշմանդամ երեխաների և երիտասարդների կենտրոնը, 'Միասին' երիտասարդական շարժումն ու անհատ ստեղծագործողներ: 'Գառնի' վոկալ կվինտետը մասնակցեց բարեգործական ցուցահանդեսին համերգային ելույթով:
Հավաքված ողջ հասույթը ՄԱԿ-ի ասոցիացիաների համաշխարհային դաշնության միջոցով կուղղվի ՄԱԿ-ի Արտակարգ հակազդման հիմնադրամին Հաիթիի բնակչությանն օգնություն տրամադրելու նպատակով:
ՄԱԿ ՀՏՎ ներկայացուցիչ Մարիա Դոցենկոն նշեց. 'Մենք սիրով աջակցում ենք հասարակական ոլորտի այս նախաձեռնությանը, որի հեղինակն է մեր լավագույն գործընկերը` ՄԱԿ-ի ասոցիացիան: Ամբողջ աշխարհում մարդիկ միավորում են իրենց ջանքերը վերակառուցելու Հաիթիին` օգնելով այս խիզախ ժողովրդին':
ՄԱԿ-ի Հայկական ասոցիացիայի փոխնախագահ Արամ Ոսկանյանն իր խոսքում նշեց. 'Յուրաքանչյուր ոք կարող է ունենալ շոշափելի ներդրում և ամենակարևոր ձեռքբերումն այն է, որ պետական, միջազգային և հասարակական ոլորտի ներկայացուցիչներն այսօր միավորվել են օգնելու Հաիթիի ժողովրդին':
Հաիթիի երկրաշարժի ականատես, ՄԱԿ-ի Մանկական հիմնադրամի փորձագետ Վիկտորիա Թերշլերն իր ելույթով հայտնեց իր երախտագիտությունը նման բարեգործական ակցիա կազմակերպելու համար և կոչ արեց չդադարել աջակցություն ցուցաբերել Հաիթիի ժողովրդին:
Ելույթներ ունեցան նաև ՄԱԿ-ի Հայկական ասոցիացիայի գործադիր տնօրեն Արփինե Դանիելյանը և Մայր Աթոռ Սուրբ Էջմիածնի և Հայկական բարեգործական ընդհանուր միության երիտասարդաց տների տնօրեն Հայր Կոմիտասը:
ՄԱԿ-ի Հայկական ասոցիացիան, հիմնադրված ՄԱԿ-ի համամարդկային արժեքների ներքո և որպես մի երկրի ներկայացուցիչ, որ գիտի, թե ինչ է երկրաշարժը կազմակերպում է բարեգործական միջոցառումների շարք Հաիթիի երկրաշարժից տուժածներին աջակցելու համար:
